يعنى أكيد مش السبعين مليون هيشاركوا فى العصيان … لكن لما واحد محترم و جامعى و مثقف و (سلبي) نزل يشتري فول مدمس و لقى بتاع الفول قافل عشان مشارك فى العصيان .. أكيد هيحس على دمه و يعرف إن لسه فى أمل فى التغيير.

أما عن نفسي فأكيد مهنتى حساسة و مرتبطه بمريض متألم .. لكن لما يكون البنى آدم ده عايش على مسكنات لمدة 25 سنة أو أكتر عشان يهرب من حقنة البنج ، يبقى الـ 24 ساعة دي أكيد مش هيموت فيها

هيما: “إيه علاقة إنتفاضة ولاد بلدك بالسياسة يا محمد”
العلاقة مباشرة 101%
“ملكش في السياسة ؟!!!”
امال اسمها سياسة ليه .. سايس امورك و دبلوماسية !
“الناس هتفرقع و انت بمنتهى البساطه “ملكش فى السياسة” ؟!”
ليه محسسني اني ارستقراطي مثلاً و ابن وزير و مش حاسس بالناس يا ابراهيم ؟
انا بشوف معاناه ربنا يعلم بيها سواء في مواصلات او غيره .. الخ زي كل الناس

الفرق اني مع كلام هشام لانها نفس القضية
فعلاً “الإضراب لا هيفيد و لا هيقلل أسعار و لا هيصلح البلد”
و تعالى كلمني يا ابراهيم .. لو انتا كطبيب اضربت اليوم ده يبقي كده تخليت ن كل مبادئ الوطنية
لانك طبيب و دي مهنة حرجة ولا ليك رأي تاني.

نرجع لكلام هشام من تاني ..
السؤال بسيط .. لو البلد يوم 6 ابريل بقت فاضية … ايه اللي هيحصل .. ولا حاجة خالص (نفسي تسمعني و انا بقولها بصوت عالي)
لانها حاجة تحرق الدم .. البلد هتبقى فاضية و كوبري اكتوبر مش هيقف عند غمرة و هاروح الكلية في نص ساعة و محطة مصر الناس هتركب درجة تالتة مش على السقف و الناس هتقعد في الاتوبيسات و سواق الوزير و المرور مش هيغرموا حاجة انهم يوقفوا المرور علشان الباشا يعدي.. و اهه يوم و البيه هيعدي مرتاح و هو مش حاسس بحاحة.

تقدر تفهمني لما شوية وزاء و هما بين قوسين بنى آدميين زيي و زيك لما يستوردوا الأكل اللي بياكلوه كل يوم و يدفعوا في اكله جمبري 350 الف جنيه علشان من هونج كونج .. يبقى الناس دي ايه بقى ؟
لا فارق اضراب و لا غير اضراب .. المهم ان البيزنس بتاعهم شغال و الحياه زي الفل.

و زي ما هما بيدورا على مصالحهم انا هدور على مصلحتي
البلد محتاجة ثورة مش مجرد اضراب و احب اؤكد ان اضراب ده مجرد خطوة في طريقة المعارضة بشكل راقى ليس الا.

لما الاقى واحد جدع منكم و عامل وطني و يقللي الاضراب ده ممكن يعمل ايه يبقى يسمعني صوته .. مش شوية كلام و الناس هتفرقع و اولاد بلدك و الثورة .. الخ
و سلملى على الوطنية .. مجرد شعب بيدور يعمل حاجة جديدة معملهاش طول حياته.

معاك يا هشام بالكامل,
معلش لو كنت بتكلم بشكل منفعل لان كلامك في الاول و الآخر يا ابراهيم فعلاً يدعو لذلك.

إبراهيم , علشان نكون واقعيين .. بعيداً عن السياسة أو غيره .. البلد دي عايزة معجزة علشان تتغير .. مش هنفضل نقول في كلام و شعارات و اعتصامات بشكل غلط … احنا فاكرين ان لو عملنا إضراب الحكومة هتوزع العيش ببلاش على الناس ! ..

الإضراب لا هيفيد و لا هيقلل أسعار و لا هيصلح البلد … يبقى ليه مندورش على مصالحنا و نخصلها بدل ما نضيع وقتنا في اعتصام مبني بأساس غلط ..