تحديث 2: هذا التحديث واجب لاخلاء مسئوليتي تماما عما حدث و سيحدث للموقع للان و مستقبلاً..واجب التنويه لهذا بسبب بعض الافعال التي بدرت من هذا الموقع و التي يشتبه انها تشير الي مثل عملية اختراق هذا المنتدي !

تحديث: دار حديث بيني و بين صاحب المنتدي عن طريق العضو صاحب المواضيع و تم حذف المواضيع من المنتدي و توضيح وجهة نظر ادارة المنتدي عن طريق صاحب الموقع.. كانت وجهة نظر الي حد ما طيبة و بعد اخر لن اتكلم عليه.


من الحاجات الحلوة ان و انا بدّون بحس اني بشبع رغبة داخلية ناتجة عن القراءة و الكتابة…مش اقل من كده و مش منتظر حاجة من اي حد.. النقطة دلوقتي لما تلاقي مواضيعك بتتسرق من غير ذكر المصدر!
طيب دلوقتي لما الواحد بيكتب “بعض حقوق المحتوي محفوظة, اتكّلم ” في Footer الموقع فيها رابط لرخصة نقل المحتويات و هي Creative Commons و هي الرخصة اللي بتمكن اي حد انه ينقل المحتوي شرط ذكر المصدر, و لما تشوف غير كده و تشوف مواضيعك بتتسرق قدام عينك في المنتديات بتحس انك حرام تكتب اساساً !

الغريب في المنتديات ديه ان اصحاب المواضيع مش بيكون عندهم مانع من ذكر المصدر و لكن اصحاب مثل هذه المنتديات هما اللي بيرفضوا وضع روابط للمواضيع ديه.. و يا ريت منتديات عليها القيمة.. منتديات تندرج لفئة منتديات الورود و الشوق و الأزهار ! للاسف :(

لما الاقي موضوعين من مدونتي منقولين بحذافيرهم “Copy && Paste” في منتدي و منسوبة لكاتبها و كاتبها ممنوع من كتابة المصدر.. يبقي اعمل ايه ؟!

الغريبة ان موضوع من المواضيع ديه هم موضوع “6 أشياء اكرهها في جوجل!” و الطريف اني في الموضوع ده كنت بتكلم عن برنامج php بقوم بتطويره حاليا و من فترة طويلة اسمه neoGuestbook .. طيب و اللي ناقل الموضوع ده مش ياخد باله مثلاً انه هيكون مسئول علي اي رد في الموضوع ده و صاحب الموضوع و البرنامج يا حسرة ه واللي هيروح في الرجلين.

لما الواحد بيكتب عشان مواضيعه تتسرق تبقي ايه الفايدة من التدوين و الكتابه في الأمور التقنية ,, نقضيها كتابات عن اجمل زهرة في العالم و اتخن رجل في الكون و احلي مكرونة في التاريخ و خلصنا !

مش عارف ايه اللي الواحد المفروض يعمله.. ممكن في كل موضوع بين كل سطر و سطر اكتب ” محتويات هذا الموقع يطبق عليها رخصة الـCreative Commons “!

اعتذر عن الكتابة بالعامية في هذا الموضوع و لكن الواحد دمه بيغلي فعلاً انه لسه في ناس و شريحة كبيرة منهم بالسوء ده !