اتكلم و أول تاج Tag !  

السلام عليكم و رحمة الله و بركاته,,
اليوم انا سعيد جداً لعدة اسباب و اهمها وصول اول تاج لمدونة اتكلم من كريم

هذه التدوينة اكتبها خلال فترة عصيبة الي حد ما و هي الامتحانات النهائية و فترة هادئة و ايجابية و التي تشهد انفراجة الي حد كبير في الاستقرار علي بعض مخططات مشاريعي التقنية و البرمجية في الصيف
سوف ابدأ مع التاج و انهي مع التاج … لن يكون هناك اي مواضيع في البداية او في النهاية او خلال التاج … سوف اكف عن الثرثرة الجانبية بهذا الموضوع

التاج و البداية

أحب شخص لقلبك في الدنيا؟
تعديل مقترح: “أحب الاشخاص لقلبك في الدنيا؟”
لا يمكن ان يكون واحدا .. الا و اذا تم اعتبار التالي واحد … ابي و امي و اختي

انسان مستعد تضحي بحياتك – ركز فى كلمة حياتك – عشانه؟
نفس الاجابة السابقة اضف اليها كل شخص دعمني و اعطاني بلا حدود .. فهو يستحق ان اضحي بحياتي فداه

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
لا أحد ! … ممكن اكره بعض الاشخاص لدرجة الجنون و لكني يستحيل ان اقتله
باستثناء اثنين: واحد عرفته في الكلية , الثاني بلاش احسن

ما هو اسم اجمل كتاب كتبه بشر قراته ومحتفظ به حتي الان؟
The Alchemist – للعالمي باولوكويلهو

اسم كتاب كتبه بشر برضة- انت متعلق بيه وبتقرأه كل فترة؟
معظم ما أقرأه لا اعود اليه الا بعد عمر مديييد

اهم جهاز منزلى انت متعلق بيه او بتستخدمه كتير؟
بالتأكيد الكومبيوتر او Beeso دلع PC

مكان تحس بالراحة عندما تدخله؟
بيتنا و المسجد

شىء تحس بالراحة النفسية عندما تنظر اليه؟
القرآن الكريم و سماء البحر الصافية

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
شوارع وسط البلد و الحسين !

اجمل مدينة زرتها داخل مصر ؟
الاسكندرية … مش عارف ليه هي اجمل مدينة زرتها في مصر … رغم ان في اماكن تانية احلي منها و لكن في الاسكندرية بحس ان في حاجة معينة بتفهمني

أجمل مكان طبيعي رأيته داخل مصر ؟
الحديقة النباتية بأسوان

شخصية كارتونية بتحبها؟
The Simpsons

نوع هاتفك المحمول؟
حالياً نوكيا … رغم ان ولائي الكامل كان لعائلة الـSony Ericsson

سرعة بروسيسور جهازك؟
2.4 جيجا هيرتز .. انتل و مش Celeron

حجم ذاكرة –هارد- جهازك؟
256 حاليا (512 سابقا .. واحدة اتحرقت:) ) … 160 جيجا (2*80 منفصلين)
واحد عليه Windows للدراسة و الاخر Linux

المساحة التى تشغلها المواد الاسلامية على جهازك؟
مساحة المواد الاسلامية ليست الدليل المطلق علي الايمان و الدروشة

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
حاجة بيني و بين اللي خالقني

أهم هدف انت واضعه لحياتك الآن؟
ممكن تقول أهداف !
1. اخلص الامتحانات علي خير
2. اكمال مشروع برنامج php عربي حر بدأته من سنتين neoGuestbook + P2core
3. تحقيق و اثبات ذاتي بمشروع عمل و برمجة في الصيف ان شاء الله

مواصفات فتاة الأحلام بالنسبة لك؟
تعرف ربنا سبحانه و تعالي .. جريئة برقّتها .. خجولة برداء ثوب الحياء … تفهم عقليتي

صف ما يأتى:شعورك لما بتسمع كلمة مصر ؟
لما بسمع كلمة مصر و أغنية محمد رفاعي “خلي عيونكم عليها” بحس بقشعريرة و بحس ان البلد مهما حصل مش ممكن تهون …

شعورك لما بتسمع كلام عن اليهود؟
اصبحت في الفترة الراهنة مصاب بتبلد في المشاعر لاني فهمت هما عايزين ايه بالظبط !

شعورك لما بتشوف ظابط شرطة؟
في بعض الاحيان بحس بالامان .. اما الطبيعي لي و انا ماشي فانا مش باخد بالي من وجودهم اساساً !

شعورك لما بتشوف الكناس العجوز فى الطريق؟
شعور متناقض و هو .. اما ان الراجل ده مجبر علي المهنة لانها سبيل اعاشته او بحس انه عبقري و واخد الدنيا ببساطة و احيانا لما اشوف وجهه احس انه مكتوب عليه : “و الله انا الوحيد اللي فاهم الدنيا فيكم يا ناس !”

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
ولا حاجة! باستثناء ان فيه بعضهم بيكون فاهم الموضوع غلط خالص و البعض الاخر معجب بمنظره و فاكر ان الاسلام هو كده !

احساس يراودك فى اشارة مرور مغلقة بسبب مسئول كبير؟
لا اتعودت خلاص …

خلص التاج الحمد لله… اتمني انه يكون عدي علي خير

دائما في نهاية التاج لازم يتم توجيهه للاخرين .. فكرت اني اعمله Dead End
بس ده أول تاج و لا يهون
التاج ده همرره الي
- فاطمة
- اي مدون في مدونة الفنون الجملية نفسه يستغل التاج ده
- Amaiko
—-
علي الهامش -مازلت لا استطيع تفادي الكلام الجانبي:)- :
شكراً محمد علي هذا الاختيار !

السلام عليكم